கண்ணம்மா என் காதலி - 1

காட்சி -வியப்பு

செஞ்சுருட்டி -ஏகதாளம்

ரசங்கள் - சிருங்காரம் ,அற்புதம்

சுட்டும் விழிச்சுடர் தான் கண்ணம்மா

சூரிய சந்திரரோ ?

வட்டக் கரியவிழி கண்ணம்மா

வானக் கருமை கொல்லோ ?

பட்டுக் கருநீலப் புடவை

பதித்த நல் வயிரம்

நட்டு நாடு நிசியில் தெரியும்

நக்ஷத்திரங்க ளடீ !

சோலை மல ரொளியோ - உனது

சுந்தரப் புன்னகையோ தான் ?

நீலக் கடலலையே உனது

நெஞ்சி லலைக ளடீ !

கோலக் குயிலோசை உனது

குரலினிமை யடீ !

வாலைக் குமரி யடீ - கண்ணம்மா !

மருவக் காதல் கொண்டேன்

சத்திரம் பேசு கிறாய் - கண்ணம்மா !

சாத்திர மேதுக் கடீ

ஆத்திரங் கொண்டவர்க்கே - கண்ணம்மா

சாத்திர முண்டோ டீ !

மூத்தவர் சம்மதியில் - வதுவை

முறைகள் பின்பு செய்வோம்

காத்திருப்பேனோடி ! இது பார்

கன்னத்து முத்த மொன்று !